«Штадлер» компаниясе Татарстанда үз җитештерүен урнаштырырга тели

Тимер юл пассажир транспорты җитештерүдә бөтендөнья лидерларының берсе «Штадлер» Швейцария концерны Татарстан территориясендә үз җитештерүен урнаштырырга тели. Бу хакта бүген Татарстан Республикасы Президенты Рөстәм Миңнехановның «Штадлер» компаниясе Директорлар советы рәисе, компания милекчесе Петер Шпулер белән очрашуында мәгълүм булды. 

«Штадлер» компаниясе тимер юл пассажир транспортының киң спектрын җитештерә: тизйөрешле, региональ һәм шәһәр яны поездлары, йокы вагоннары, трамвайлар һәм метро вагоннары. Компания заводлары Швейцариядә, Германиядә, Польшада, Венгриядә, Чехиядә, Италиядә, Австриядә, Нидерландта, Испаниядә, Алжирда, АКШта һәм Беларусь Республикасында урнашкан.

Бүген «Штадлер» үз җитештерүен Россиядә урнаштырырга планлаштыра. Потенциаль мәйданчык итеп Татарстан Республикасын карый.   

Рөстәм Миңнеханов билгеләп үткәнчә, Татарстанда машина төзелеше тармагы киң үсеш алган. «Без самолетлар, вертолетлар, җиңел һәм йөк  автомобильләре җитештерәбез. Хәрби һәм граждан суднолары җитештерү заводы бар», - диде ул. 

Рөстәм Миңнеханов хәбәр иткәнчә, республикада инвесторлар белән эшләү системасы корылган. «Үз җитештерү линияләрен урнаштыру өчен күп кенә бөтендөнья компанияләре Татарстанны сайлады. Сезгә дә кирәкле ярдәм күрсәтергә әзербез», - диде ТР Президенты. 

Рөстәм Миңнеханов «Штадлер» вәкилләрен инфраструктура белән танышу һәм җитештерүне урнаштыру мөмкинлекләрен өйрәнү өчен Татарстанга чакырды.