Рөстәм Миңнеханов Бәһрәйн ислам банкының башкарма директоры белән очрашты
Бүген Бәһрәйн Мәмләкәтенә эш сәфәре кысаларында Татарстан Республикасы Президенты Рөстәм Миңнеханов Бәһрәйн ислам банкының башкарма директоры Хәсән Әмин Җәррар белән очрашты.
Бәһрәйн ислам банкы – Мәмләкәттәге беренче ислам банкы һәм Бәһрәйн Үзәк банкы күзәтчелегендә эшли, Бәһрәйн фонды биржасында теркәлгән. Бүген банк ислам финанславы өлкәсендә актив эшли. Инновацияләр, көчле корпоратив идарә һәм клиентларга хезмәт күрсәтүне тәэмин итү өчен заманча технологияләрдән файдалану Бәһрәйн ислам банкының Фарсы култыгындагы урынын ныгытырга ярдәм итә.
Очрашу барышында Татарстан Республикасы Президенты Россия кысаларында республиканың социаль-икътисадый хәле турында сөйләде. Ул билгеләп үткәнчә, Татарстан ислам банкингы һәм финанславы принципларын гамәлгә кертү буенча илнең сынау төбәге булып тора, һәм бу өлкәдәге хезмәттәшлек өчен яхшы мөмкинлекләр бар.
«Бүген Ислам үсеш банкы белән берлектә зур эш алып барыла. ИҮБ һәм Россия Үзәк банкы хезмәттәшлек турында меморандум имзалады, эш төркеме төзелде, анда Татарстан вәкилләре дә катнаша. Россиядә партнерлык банкингын үстерү һәм Татарстан Республикасы территориясендә партнерлык банкингы һәм финанславы хезмәт күрсәтүләре буенча сынау проекты буенча юл карталары гамәлгә ашырыла. Шулай ук Татарстан Республикасы Хөкүмәте, Россия Саклык банкы һәм Ислам үсеш банкы арасында Россия ислам икътисады үзәген булдыру мәсьәләсе карала. Гамәлдәге Россия законнары кысаларында республика ислам икътисады инструментларын сынау буенча потенциаль мәйданчыкларның берсе дип күзаллана», - диде Рөстәм Миңнеханов.
Очрашу азагында Татарстан Президенты Россия һәм мөселман дөньясы арсында хезмәттәшлек өчен нәтиҗәле мәйданчык булып торучы, ел саен уза торган «Россия – Ислам дөньясы: «KazanSummit» халыкара икътисадый саммиты турында сөйләде, һәм Хәсән Әмин Җәррарны быел 10 – 12 майда Казанда булачак 10 нчы саммитка чакырды.
Очрашу барышында Хәсән Әмин Җәррар хәбәр иткәнчә, ул тумышы белән Фәләстиннән, әмма аның ерак бабалары татар булганнар һәм ул, Татарстан Республикасына һичшиксез барачакмын, дип белдерде.