Рөстәм Миңнеханов Швейцариянең Россиядәге Илчесе Ив Россье белән очрашты
Бүген Татарстан Республикасы Президенты Рөстәм Миңнеханов Швейцариянең Россиядәге Гадәттән тыш һәм Тулы вәкаләтле Илчесе Ив Россье белән очрашты.
Очрашу Казан Кремлендә узды.
Татарстан Республикасы Президенты Илчегә быел март аенда Татарстан делегациясенең Женевага эш сәфәрен оештыруда күрсәткән ярдәме өчен рәхмәт белдерде. Ул искәрткәнчә, эш сәфәре барышында Татарстан белән Швейцария бизнес-даирәләре катнашында эшлекле форум, төрле Швейцария компанияләре белән файдалы очрашулар уздырылды.
Рөстәм Миңнеханов билгеләп үткәнчә, халыкара вәзгыятькә карамастан, Татарстан белән Швейцария арасындагы мөнәсәбәтләрне саклап калырга һәм киңәйтергә кирәк. Үткән ел йомгаклары буенча товар әйләнеше 20%ка арткан.
Хезмәттәшлекнең перспектив юнәлешләреннән Рөстәм Миңнеханов нефть химиясен, машина төзелешен һәм станоклар төзелешен, ИТ өлкәне, фармацевтика һәм медицинаны, авыл хуҗалыгы һәм башкаларны атады.
Ив Россье үз чиратында билгеләп үткәнчә, бүгенге шартларда икътисадый мөнәсәбәтләрне саклап калырга, аерым алганда, инвестицион эшчәнлекне үстерергә кирәк.