Илсур Метшин X Бөтендөнья шәһәрләр форумында катнаша
Бүген Берләшкән Гарәп Әмирлекләренең Абу-Даби шәһәрендә «Шәһәрләр – мөмкинлекләр территориясе: мәдәният һәм инновацияләр үзара бәйләнеше» X Бөтендөнья шәһәрләр форумы ачылды, ул 168 илдән 18 мең катнашучыны җыйды. Форум эшендә Казан Мэры Илсур Метшин да катнаша.
X Бөтендөнья шәһәрләр форумы Абу-Даби шәһәренең Милли күргәзмә үзәгендә уза, биредә 18 меңнән артык катнашучы җыелган, шул исәптән Европа, Азия, Африка һәм Америкадан 500-гә якын шәһәр һәм муниципалитет мэры катнаша. Форум программасы кысаларында ачык дискуссияләр һәм пленар сессияләр үткәрү каралган, анда муниципалитетлар үсешендә яңа алымнар һәм ысуллар турында фикер алышачаклар. Сессиядә катнашучылар тотрыклы шәһәрләр өчен финанслауның инновацион механизмнары, торак, мобильлек, планлаштыру һәм идарә өлкәсендә шәһәр чишелешләре, миграциянең шәһәргә йогынтысы һәм башка күп кенә темалар буенча фикер алышачак. Форум программасында барлыгы 450 спикер чыгыш ясаячак.
Бөтендөнья шәһәрләр форумы (WUF) 2002 елда БМО-Хабитат тарафыннан хәзерге заманның иң кискен дөньякүләм проблемаларын карау өчен гамәлгә куелды: тиз үсә торган урбанизация һәм аның җәмгыятькә, шәһәргә, икътисадка йогынтысы. Форум ике елга бер тапкыр уздырыла һәм дөньяның 160 иленнән катнашучыларны җыя. Форумның киң вәкиллеге, югары дәрәҗәдәге катнашучылар белән беррәттән, әлеге чараны шәһәр үсеше мәсьәләләре буенча фикер алышу өчен төп халыкара мәйданчык итә.
И.Метшинның эш визиты барышында берничә эшлекле очрашу, шулай ук җирле һәм төбәк хакимиятләренең «Шәһәр идарәсе структурасын төзү: уңайлы шартлар тудыру» түгәрәк өстәлдә катнашу планлаштырылган. Җирле һәм төбәк хакимият органнары вәкилләре гамәлдәге координацияләү механизмнары турында фикер алышачак, уртак инициативаларның потенциалын өйрәнәчәкләр һәм шәһәр үсешенең яңа көн тәртибен гамәлгә ашырганда барлыкка килгән гомуми проблемаларны хәл итү турында фикер алышачаклар.
Дүшәмбе, 10-нчы февральдә, Казан Мэры Берләшкән Милләтләр Оешмасының Генераль секретаре ярдәмчесе, БМО-Хабитат башкарма директоры урынбасары Виктор Кисоб белән очрашачак. Бу көнне шулай ук Берләшкән Милләтләр Оешмасы каршындагы җирле хакимият органнарының Консультатив Комитеты (United Nations Advisory Committee of Local Authorities, UNACLA) утырышы булачак. Исегезгә төшерәбез, узган елның ноябрендә «Берләшкән шәһәрләр һәм җирле хакимият» бөтендөнья оешмасының VI конгрессында Илсур Метшин Консультатив комитет президенты итеп сайланды.
И.Метшин рәислегендәге быелгы беренче утырыш эшендә биш континенттан хакимиятнең җирле органнары берләшмәләрен тәкъдим итүче UNACLA әгъзалары катнашачак: Көньяк Америка, Азия, Африка, Төньяк Америка һәм Көньяк Америка. Чарада UNACLA эшчәнлегенә 2015 елдан 2019 елга кадәр йомгак ясау планлаштырыла. Казан Мэрының киләсе елларга UNACLA эшчәнлеген ничек күрүе турындагы доклад белән чыгышы утырышның төп пункты булачак. Утырыш нәтиҗәләре буенча 2020 елга юл картасы расланыр дип планлаштырыла.