Рөстәм Миңнеханов Италиянең РФндәге илчесе Паскуале Терраччано белән очрашты

Бүген Татарстан Республикасы Президенты Рөстәм Миңнеханов Италиянең Россия Федерациясендәге Гадәттән тыш һәм Тулы вәкаләтле Илчесе Паскуале Терраччано белән очрашты. Чара Казан Кремлендә узды. 

Рөстәм Миңнеханов сәламләү сүзендә искәрткәнчә, ул Сочидагы форум кысаларында быел фераль аенда Паскуале Терраччано белән очрашкан иде. "Безнең Италия компанияләре белән хезмәттәшлек итү тәҗрибәбез бай, шулар арасында - “Пирелли”, “Teкнимонт”, “Баллестра”, “Базелл”, “Интеза”, “Сайпем”, “Орланди”, “Вомм”  һәм башкалар. Күбесе безнең нефть химиясе, машина төзү, авыл хуҗалыгы өлкәсендәге проектларда катнаша", - диде Татарстан Президенты. 

ТР Президенты билгеләгәнчә, бүген товар әйләнеше күләмен арттыруга мөмкинлекләр зур. "Проектлар кирәк, эшебезне активлаштырырга кирәк. Узган елда ук үзара сәүдә 23 процентка үсеш күрсәтте", - диде Рөстәм Миңнеханов.

Татарстан Президенты сүзләренчә, хезмәттәшлекне үстерүгә юнәлешләр күп: нефть эшкәртү, нефть химиясе, автомобиль төзү, автокомпонентлар, шиналар җитештерү, ИТ, авыл хуҗалыгы. "Иң мөһиме - безнеэ элемтәләр тарихы бар", - диде ТР Президенты. 

Рөстәм Миңнеханов шулай ук игътибар иткәнчә, Татарстанда инвесторлар өчен бөтен кирәкле инфраструктура бар.

Яклар алга таба сәүдә-икътисадый, гуманитар өлкәләрдә Россия-Италия мөнәсәбәтләре кысаларында Татарстан белән Италия хезмәттәшлеген киңәүтүгә таба адымнар турында сөйләштеләр.