Рөстәм Миңнеханов KazanSummitта Саклык банкының эшлекле иртәнге ашында катнашты

Бүген «Россия – Ислам дөньясы: KazanSummit» X халыкара икътисадый саммиты киңлекләрендә «Россия – Ислам дөньясы: Стратегик партнерлык» темасына Саклык банкының эшлекле иртәнге ашы узды. 

Чарада Татарстан Республикасы Президенты Рөстәм Миңнеханов, «Саклык банкы» ГАҖ Идарәсе рәисе урынбасары киңәшчесе Бехнам Гурбан-Задә, Идел-Нократ банкы вице-президенты – рәисе Петр Колтыпин, Ислам икътисадын үстерүнең Дубай үзәге генераль директоры Абдулла Мөхәммәд Әләвәр, Ислам үсеш банкы вице-президенты Замир Икбаль катнашты. 

Чарада катнашучылар Россия белән Ислам илләре арасындагы өстенлекле хезмәттәшлек мәсьәләләре турында, аерым алганда, Ислам банкингы өлкәсендә үзара хезмәттәшлек, хәләл секторны үстерү мәсьәләләре турында, башка актуаль темалар буенча фикер алыштылар.

Чыгышында Рөстәм Миңнеханов билгеләп үткәнчә, KazanSummit форумы ел саен көчәя бара һәм үткән ун ел эчендә күзгә күренеп үзгәрде. 

«Без унынчы мәртәбә җыелабыз, KazanSummit куәтләнә бара. Бу ун ел эчендә без ун тапкырга үстек. Бүген бу саммит бөтенләй башка – Ислам банкингы темасыннан инде хәләл яшәү рәвеше темасына кадәр үсте. Форум Россия Президенты хуплавына иреште. Казан мәйданчыгы аша Россия Ислам дөньясы белән тыгыз багланышлар урнаштырырга тиеш дигән йөкләмә бар», – диде Рөстәм Миңнеханов.

Татарстан Президенты искәрткәнчә, бүген илдә 20 миллионга якын мөселман яши, һәм ул, Казан форумы Россиягә Ислам дөньясы белән якынаерга ярдәм итәр, дип өмет белдерде.