Татарстан Президенты Russia Halal Expo күргәзмәсен карады

Бүген Татарстан Республикасы Президенты Рөстәм Миңнеханов «Россия – Ислам дөньясы: KazanSummit» X халыкара икътисадый саммиты киңлекләрендә оештырылган Russia Halal Expo күргәзмәсен карады, күргәзмә «Корстон» КСККда узды. 

Искәртәбез, быелгы саммитның төп темасы – хәләл яшәү рәвеше. 

Russia Halal Expo төп максаты – Россиядә хәләл индустрияне популярлаштыру, Россия икътисадының хәләл сегменты потенциалын күрсәтү, потенциаль сатып алучыларга һәм сәүдә партнерларына продукцияне тәкъдир итү мөмкинлеген бирү.   

Рөстәм Миңнеханов белән күргәзмәне Татарстан Республикасы Дәүләт Киңәшчесе Минтимер Шәймиев, Татарстан Республикасы Дәүләт Советы Рәисе Фәрит Мөхәммәтшин, KazanSummitның мәртәбәле кунаклары карады. 

Үз продукциясен һәм хезмәт күрсәтүләрен Россия, Согуд Гарәпстаны, БГӘ, Төркия, Иран, Казахстан һәм Үзбәкстаннан 80нән артык экспоненты тәкъдим итте.

Күргәзмә экспозициясе төрле тематик зоналарга бүленгән: ашамлык продукциясе, фармацевтика, косметика, бизәнү әйберләре, кием-салым, балалар уенчыклары һәм китаплар, башка товарлар. 

Күргәзмәне карап чыгуга ук, Рөстәм Миңнеханов KazanSummit пленар утырышында чыгыш ясаучылар белән очрашу уздырды.