Рөстәм Миңнеханов: Тышкы сәясәттәге вазгыятькә карамастан, ислам партнерлары безнең белән кала

Тышкы сәясәттәге вазгыятькә карамастан, Россиянең ислам дөньясы иләрендәге партнерлары хезмәттәшлекне дәвам итә. Бу хакта Татарстан Республикасы Президенты Рөстәм Миңнеханов "Россия – Ислам дөньясы: KazanSummit 2018" X халыкара икътисадый саммитындагы матбугат конференциясендә белдерде. 

“Тышкы сәясәттәге вазгыятькә карамастан, ислам партнерлары безнең белән. Биредә ислам банкингы аша финанслар алырга, безнең илдә яңа продуктларны үстерергә була. Әмма болар барысы да без башкарырга тиешле билгеле бер адымны таләп итә. Иң мөһиме – ул көчле партнерлар. Татарстан үзе генә башкарып чыга алмый, ил масштабы турында сөйләшергә кирәк. Бу эштә безне Россия Тышкы эшләр министрлыгы хуплый, Россия Федерациясе Президенты хуплый”, - диде Рөстәм Миңнеханов.

Республика башлыгы Ислам үсеше банкы, Ислам хезмәттәшлеге оешмасы, Дубайдагы ислам банкы һәм башка шундый ислам финанслау институтлары белән актив эшләргә кирәклеген җиткерде. Әлеге эшкә республикада ихтыяҗ бар, дип билгеләп үтте ул.

“Мин саммит куйган максатлар һәм бурычлар үтәлә, дип саныйм. Иң мөһиме – берәү дә беркемне дә мәҗбүр итми. Кешеләр кызыксынып үзләре килгән, чөнки аларга кызыклы”, - дип җиткерде Татарстан Президенты.