Рөстәм Миңнеханов KazanSummit кысаларында Согуд Гарәбстаны делегациясе белән очрашты
Бүген Татарстан Республикасы Президенты Рөстәм Миңнеханов "Россия – Ислам дөньясы: KazanSummit 2018" X халыкара икътисадый саммиты кысаларында Согуд Гарәбстаны делегациясе белән очрашты.
Очрашуда Согуд Гарәбстаны дин буенча министры урынбасары Абдулла Хәйдан, Согуд Гарәбстанының Россиядәге илчесе Раид Кримли, ТР Президенты ярдәмчесе Радик Гыйматдинов, ТР Инвестицион үсеш агентлыгы җитәкчесе Талия Миңнуллина, Татарстан мөфтие Камил хәзрәт Сәмигуллин һәм башкалар катнашты.
Очрашуда Татарстан Республикасы белән Согуд Гарәбстаны арасында хезмәттәшлекне ныгыту мәсьәләләре турында сүз барды. Аерым алганда, "Россия - Ислам дөньясы" стратегик күзаллау төркеме кысаларында багланышлар турында сөйләшенде, төркемнең чираттагы утырышы Гарәбстан ярымутравының иң зур иле территоирясендә узачак.
Абдулла Хәйдан саммитның югары дәрәҗәдә оештырылуын билеләп узды. "Әлеге мәйданчык Татарстан белән Согуд Гарәбстаны эшлекле даирәләрен бәйләүче мәйданчык булып тора. Татарстан үз чиратында Россия - Согуд Гарәбстаны арасында күпер ролен үти", - дип ассызыклады ул.
Рөстәм Миңнеханов Согуд Гарәбстаныннан олы делегация килүе өчен рәхмә белдерде.
Татарстан Президенты Согуд Гарәбстаны сәүдә һәм инвестицияләр министры Мәҗед Әль-Кассаби республикага килер дип өметләнүе турында әйтте.