Татарстан Президенты Рөстәм Миңнеханов "КАМАЗ" ГАҖнең пилотсыз электробусы мөмкинлекләре белән танышты

Бүген "КАМАЗ" ГАҖ белгечләре Казанда автомобиль төзү тармагының алдынгы казанышын пилотсыз электробусны презентацияләделәр. 

"Татнефть-Арена" боз сарае алдындагы мәйданчыкта узган чарада Татарстан Республикасы Президенты Рөстәм Миңнеханов катнашты. 

"Киң адаптив транспорт логистикасы" ("ШАТЛ") автоном идарә прототипы мөмкинлекләрен кунакларга тәкъдим иттеләр. Электробусның өстенлекле мөмкинлекләре арасында эксплуатациядә югары нәтиҗәлек, экологик булуы һәм тавышсыз хәрәкәт итә алуын атадылар. 

Пилотсыз транспорт хәрәкәт өчен цифрлы карталар, навигатор системалары һәм техник күрү органнары мәгълүматларын куллана.

Электробус тизлеге сәгатенә 110 километрга кадәр җитә ала, ә күргәзмә зонада сәгатенә 40 км тизлегендә йөри. Бүген "ШАТЛ" 650 метрны сәгатенә 15 км тизлегендә узды. Автомобиль объктларны таный, маршрутны билгели һәм тизлекне сайлый. 

Беренчеләрдән булып пилотсыз электробуста Рөстәм Миңнеханов узды һәм сәяхәтеннән видеоны Instagram битендә күрсәтте. 

"Барысы да дөрес эшли. Электробусның мөмкинлекләре күп, әмма законнар әлегә аның кулланышын чикли. Шуңа да бүген бары демонстрацион рәвештә генә йөреп карадык. Автомобиль платформасы аны күп төрле проектларда куллану мөмкинлеген тәэмин итә, ул тавышсыз, бик йомшак. Искиткеч", - диде Рөстәм Миңнеханов.