Рөстәм Миңнеханов Чехия делегациясе белән агросәнәгать өлкәсендә хезмәттәшлек мәсьәләләре турында сөйләште
Татарстан белән Чехиянең авыл хуҗалыгы өлкәсендә хезмәттәшлек мөмкинлекләре күп. Бу хакта бүген Татарстан Республикасы Президенты Рөстәм Миңнеханов Чехия Республикасының авыл хуҗалыгы министры Мирослав Томан җитәкчелегендәге Чехия эшлекле даирәләре вәкилләре белән очрашуда белдерде. Очрашу Казан Кремлендә узды. Очрашуда Чехия Республикасыныд Россия Федерациясендәге Гадәттән тыш һәм Тулы вәкаләтле Илчесе Витезслав Пивонька катнашты.
«Без Россия-Чехия мөнәсәбәтләре кысаларында безнең хезмәттәшлегебез дәрәҗәсен югары бәялибез. Кайбер юнәлешләр буенча актив эш алып барыла. Ышанам, мондый вәкаләтле делегациянең визиты Татарстан белән Чехия арасында элемтәләрне ныгытуга хезмәт итәчәк», - диде Рөстәм Миңнеханов.
Мирослав Томан Татарстанга Чехия делегациясе визитының нәтиҗәләре турында кыскача сөйләде. Кунаклар "Элита" нәселле терлек үрчетү предприятиесе, «Майский» теплица комбинатында һәм Казан дәүләт аграр университетында булганнар. Моннан тыш, кунаклар Татарстан-Чехия бизнес-форумында катнашкан. "Сезгә визитны югары дәрәҗәдә оештырылуы өчен рәхмәт белдерәм. Без дә Чехия белән Татарстан хезмәттәшлеге үсешенә ярдәм итәргә әзер", - диде министр.
Шуннан Чехия компанияләре вәкилләре Татарстан белән хезмәттәшлек итүдә кызыклы юнәлешләрне билгеләделәр. Алкоголь эчемлекләр җитештерүче компания Татарстанда җиләк-җимеш чималы сатып алырга тели. Рөстәм Миңнеханов әлеге мәсьәләне профильле белгечләргә хәл итәргә йөкләде.
"CBS" компаниясе эре мөгезле терлек һәм дуңгыз үрчетү өлкәсендә хезмәттәшлек тәкъдим итте. «Нәсел ле терлек үрчетү эшен дөрес оештыру авыл хуҗалыгында бик зур әһәмияткә ия. Актив хезмәттәшлек итәчәкбез», - диде Татарстан Президенты.
"MADETA" компаниясе генераль директорына (Чехиядә иң зур сөт эшкәртүче) Рөстәм Миңнеханов республика территориясендә җитештерүне локальләштерү вариантын карарга тәкъдим итте. «Татарстан сөт җитештерү буенча Россиядә беренче урында тора. Әгәр сез хәл итәсез икән, без сезгә ярдәм итәргә әзер», — диде ул.
"INTERLACTO" катнаш терлек азыгы җитештерү өлкәсендә хезмәттәшлек перспективалары турында хәбәр итте. Компания үз продукциясен Кытай, Россия, Балканга, Көньяк Америкага, Европа һәм Якын Көнчыгыш илләренә экспортлый.
«Терлк азыгы җитештерү дә безгә алга барырга кирәк, - дип билгеләп үтте Рөстәм Миңнеханов. - Терлек азыгы белән системалы эш алып бару нәтиҗәсендә без терлекчелек өлкәсендә продуктивлылыкны арттыра алабыз».
Татарстан Президенты Чехия эшлекле даирәләре вәкилләренә Татарстан белән хезмәттәшлек мәсьәләләренә игътибарлы булулары өчен рәхмәт белдерде һәм республика бу мәсьәләдә тулы ярдәм күрсәтәчәк, дип өстәде.