Алексей Песошин Kazan Digital Week-2021 халыкара форумын уздыруга әзерлек буенча утырыш уздырды
Бүген ТР Хөкүмәте йортында Kazan Digital Week - 2021 халыкара форумын уздыруга әзерлек буенча фикер алыштылар.
Утырыш ТР Премьер-министры Алексей Песошин рәислегендә узды. Видеоконференцэлемтә режимында узган чарада төрле ведомство вәкилләре катнашты.
Алексей Песошин билгеләгәнчә, 2020 елда форум үзенең актуальлеген һәм җәлеп итүчәнлеген күрсәткән. 60 программа чарасында Россиядән һәм 64 чит илдән 10,5 мең кеше катнаша, форум эшен 74 илдән 28 мең кеше күзәтә, виртуаль күргәзмәдә 100дән артык экспонент катнаша.
Форумның идеясе РФ Хөкүмәте рәисе Михаил Мишустин, РФ Хөкүмәте әгъзалары, губернаторлар, зур ИТ-компания җитәкчеләре тарафыннан хупланды.
Kazan Digital Week форумын ел саен уздыру турында карар кабул ителде.
2021 елда Kazan Digital Week халыкара цифрлы форумы 21-24 сентябрьдә “Казан Экспо” халыкара күргәзмәләр үзәге мәйданчыкларында катнаш форматта (онлайн һәм оффлайн) узачак.
Форумга әзерлекнең барышы турында җентекләбрәк “Юл хәрәкәте куркынычсызлыгы” директоры, оештыру комитеты рәисе урынбасары Рифкать Миңнеханов сөйләде.
Kazan Digital Week - 2021 Халыкара форумының төп юнәлешләре – интеллектуаль транспорт системалары, ситуацион үзәкләр, 4.0 цифрлы индустриясе, финтех экосистемасы, яңа дәвернең киберкуркынычсызлыгы, мәгариф, мәдәният һәм сәламәтлек саклау өлкәләренә интеграцияләнгән цифрлы технологияләр.