Рөстәм Миңнеханов: Бердәм уеннар - бер-беребезне аңларга ярдәм итүче махсус проект
Махсус Олимпиаданың Бердәм Уеннарын ачу тантанасы бүген «Казан Экспо» мәйданчыгында узды. Чарада Татарстан Президенты Рөстәм Миңнеханов, Россия Спорт министры Олег Матыцин һәм Россия Махсус Олимпиадасы президенты Ольга Слуцкер катнашты.
Махсус Олимпиаданың Бердәм Уеннары инклюзив җәмгыятьне үстерүгә һәм сәламәтлек мөмкинлекләре чикләнгән кешеләрне физик культура һәм спорт белән даими шөгыльләнүгә җәлеп итүгә юнәлдерелгән. Быел Махсус Олимпиада хәрәкәтенә 55 ел тула. Россия ярышларда 1990 елдан бирле катнаша.
«Бердәм уеннар - бер-беребезне аңларга ярдәм итүче махсус проект. Барлык атлетлар да үз көчләрен сынап карый, җиңү шатлыгын тоя һәм җанатарларның хисләре белән тулысынча ләззәтләнә алачак. Барыгызны да тормышка мәхәббәт һәм үз казанышларыгызда алга барырга омтылу берләштерә. Татарстанда сез һәм сезнең якыннарыгыз үзләрен уңайлы һәм җайлы хис итәрләр, дип ышанам. Без моның өчен кулдан килгәннең барысын да эшләячәкбез», - диде Рөстәм Миңнеханов.
«Уеннар катлаулы шартларда уза, әмма без Россиядә һәрвакыт ачыклык күрсәтәбез. Мин Беларусь дусларыбызга һәм үз командаларын җибәргән барлык төбәкләргә ярышларда катнашулары өчен рәхмәтлемен. Бу - бергә булу һәм безнең балалар өчен кирәкле нәрсәләрне булдыру өчен зур миссия. Барлык катнашучыларга да бәйрәм һәм җиңүләр теләп калам. Бу традициягә әверелер һәм киләсе уеннарга төрле илләрдән тагын да күбрәк катнашучылар килер, дип ышанам», - дип ассызыклады Олег Матыцин.
«Интеллект үсеше үзенчәлекләре булган балаларны тәрбияләүче ата-аналарга һәм гаиләләргә соклануымны һәм хөрмәтемне белдерәм. Сез үзегезнең игелекле, түземлегегез һәм якыннарыгызга ышануыгыз белән безнең барыбызга да үрнәк булып торасыз», - диде Ольга Слуцкер үз чиратында.
Ярышлар бер үк вакытта 10 җәйге һәм 8 кышкы спорт төрләре буенча үткәреләчәк. Татарстан башкаласына узган ярышларга Россиянең 59 төбәгеннән һәм Беларусь Республикасыннан 2000нән артык махсус спортчы, тренер һәм озатып йөрүче спортчы килде. Ярышлар 27 гыйнварга кадәр дәвам итәчәк.